Sumqayıt-Bakı yolunda avtomobilləri vuran sürücü hadisə barədə danışıb. Sumqayıt24 bu haqda 22 oktyabr tarixində Qafqazinfo.az-a istinadən xəbər verir.
Yüksək sürətlə hərəkət edən avtomobil ilə qarşısına çıxan maşınları vuran sürücü Elməddin Abbasov bildirib ki, şəkər xəstəsidir və meyvə alveri ilə məşğuldur.
“2009-cu ildən şəkər xəstəliyindən əziyyət çəkirəm. Məndə şəkər qalxıb-düşür. Hadisə günü “Meyvəli” bazarından işimlə əlaqədar çıxandan sonra bir konfet yeyib yola düşmüşəm. 6-cı mikrorayona getməli idim, gedib çıxmışam Sumqayıta. Sosial şəbəkələrdə bilib-bilmədən danışanlara demək istəyirəm ki, şəkər xəstəsiyəm və komada olmuşam. Bəziləri qınayır, deyir ki saxlayardın maşını. Mənim ağlım başımda olmayıb”, - deyə Abbasov bildirib.
Sürücü onu da əlavə edib ki, işi maşınla meyvə alıb-satmaqdır:
“Bu günə qədər belə bir problem yaşamamışdım. Ailəmi, uşaqlarımı bu iş sayəsində dolandırıram”.
