Dövlət Məşğulluq Agentliyinin həyata keçirdiyi "PeşəFest-2026" layihəsinə başlanıb və layihə üzrə ilk tədbir Sumqayıt şəhərində keçirilib.
Sumqayit24.az xəbər verir ki, bu barədə Dövlət Məşğulluq Agentliyindən məlumat verilib.
"Peşə öyrən, gələcəyini qur!" devizi ilə təşkil olunan festival şagird, tələbə və onların valideynlərini əmək bazarında aktual olan peşələr barədə məlumatlandırmaq və gənclərin peşə seçiminə dəstək olmaq məqsədi daşıyır.
Festivalda iştirakçılar müxtəlif peşələrin özünəməxsusluqları və tələb olunan bacarıqlar barədə faydalı məlumatlar əldə etmək, mütəxəssislərlə ünsiyyət qurmaq imkanı qazanırlar.
Tədbirdə Sumqayıt Şəhər İcra Hakimiyyətinin başçısı Zakir Fərəcov, millət vəkilləri Hicran Hüseynova, Tahir Mirkişili, Mehriban Vəliyeva, Səbinə Salmanova və Elnarə Akimova, Dövlət Məşğulluq Agentliyinin İdarə Heyətinin sədri Hasil Abbasov, ayrı-ayrı dövlət və özəl təşkilatların rəhbər şəxsləri, ictimaiyyət nümayəndələri iştirak ediblər.
