İnsanları təşvişə salan Sumqayıt sakininə hökm oxunub. Sumqayıt24 bu haqda 2 avqust tarixində xəbər verir.
Sumqayıt Ağır Cinayətlər Məhkəməsi terrorçuluq barədə bilə-bilə yalan məlumat verən 23 yaşlı Fərid Butayevi 2 il müddətinə azadlıqdan məhrum edib.
Ötən il Bakı metrosunda terror aktı – partlayış törədiləcəyi barəsində səs yazısı yayılmışdı. Dövlət Təhlükəsizliyi Xidmətinin (DTX) keçirdiyi tədbirlərlə Fərid Butayev saxlanılıb və barəsində Cinayət Məcəlləsinin 216-cı (terrorçuluq barədə bilə-bilə yalan məlumat vermə) maddəsi ilə iş açılaraq təqsirləndirilən şəxs qismində məsuliyyətə cəlb edilib.
Bildirilib ki, Fərid ötən ilin 3 mart tarixində “WhatsApp”da admini olduğu 400 nəfərlik “İş elanları” qrupuna terror barədə səs yazısı göndərib.
