27 sentyabr 2020-ci ildə Ermənistan silahlı qüvvələri cəbhəboyu zonada Azərbaycan Ordusunun mövqelərini intensiv atəşə tutdu. Bu, İkinci Qarabağ müharibəsinin başlanğıcı idi. Vətən müharibəsi Azərbaycan Ordusunun qələbəsi ilə bitdi. Azərbaycanın ərazi bütövlüyü isə bərpa olundu.
Azərbaycanda Zəfər Gününün təsis edilməsi haqda Prezident İlham Əliyev ilk Sərəncamını dekabrın 2-də vermişdi. Buna əsasən, Zəfər Günü hər il noyabrın 10-da, üçtərəfli bəyanatın imzalandığı gündə keçirilməli idi. Lakin 10 noyabr Türkiyədə Mustafa Kamal Atatürkün anım günü olduğundan Prezident İlham Əliyev Zəfər Gününün tarixinin dəyişdirilməsi barədə qərar qəbul etmişdir. Şuşa şəhərinin işğaldan azad edilməsi nəzərə alınaraq, Zəfər Gününün hər il noyabrın 8-də qeyd edilməsi qərara alınmışdır.
44 gün davam edən hərbi əməliyyatlar nəticəsində Azərbaycan Ordusu tərəfindən Cəbrayıl, Füzuli, Zəngilan, Qubadlı, Şuşa şəhərləri, işğal olunmuş rayonların 300-dən çox yaşayış məntəqəsi, həmçinin Ağdərə, Murovdağ və Zəngilan istiqamətlərində mühüm strateji yüksəkliklər işğaldan azad edildi. 10 noyabr 2020-ci ildə Azərbaycan, Ermənistan və Rusiya arasında imzalanan bəyanatdan sonra isə 20 noyabr - Ağdam, 25 noyabr - Kəlbəcər, 1 dekabr isə Laçın rayonu işğaldan azad olundu.
