Sumqayıt şəhərinin Corat qəsəbəsində işıqların tez-tez sönməsi ilə bağlı şikayət var.
Sumqayit24.az-a müraciət edən vətəndaşların sözlərinə görə, qəsəbənin Elgin Abbaslı küçəsində elektrik enerjisinin verilişində mütəmadi fasilələr yaranır. Bildirilir ki, bu hal sakinlərin gündəlik həyatında müxtəlif çətinliklər yaradır.
"Demək olar ki, hər gün işıqlar sönür. Hələ yay gəlməyib, vəziyyət belədir. Qaynar xəttə zəng edirik, düşmək olmur. Bu gecə də işıq sönmüşdü, yandı, yarım saat keçmədi, yenidən söndü. Bir də səhərə yaxın işıq yandı", - deyə qəsəbə sakini bildirib.
Vətəndaşlar aidiyyəti qurumlardan məsələnin araşdırılmasını və mövcud problemin həll edilməsini tələb edirlər.
Məsələ ilə bağlı müvafiq quruma sorğu ünvanlanıb.
