Corat qəsəbəsi ərazisində küçə itlərinin yaratdığı təhlükə sakinləri ciddi narahat edir.
Belə ki, Sumqayit24.az-a müraciət edən sakin bildirib ki, məktəbə gedən azyaşlı qız küçədə yatan it sürüsünün hücumuna məruz qalıb. İddialara görə, sakit şəkildə yoluna davam edən uşağı görən itlər qəfil oyanaraq onun arxasınca qaçmağa başlayıblar. Qorxu içində geri qaçan məktəbli ərazidən uzaqlaşaraq canını güclə qurtara bilib. Hadisədən sonra uşağın ciddi qorxu keçirdiyi qeyd olunur.
Sakinlərin sözlərinə görə, son vaxtlar qəsəbədə sahibsiz itlərin sayı nəzərəçarpacaq dərəcədə artıb. Xüsusilə məktəb yollarında və yaşayış məhəllələrinin yaxınlığında sürü halında dolaşan itlər həm uşaqlar, həm də yaşlı insanlar üçün təhlükə yaradır.
Vətəndaşlar bildirirlər ki, problemin həlli heyvanlara qarşı zorakılıq deyil, onların nəzarət altına alınmasıdır. Onların fikrincə, küçə itləri toplanmalı, sterilizasiya olunmalı və xüsusi sığınacaqlara yerləşdirilməlidir.
