Bakı–Sumqayıt yolunda baş vermiş ağır yol qəzası ilə bağlı təfərrüatlar məlum olub. Bu haqda 2 avqust tarixində Sumqayıt24 xəbər verir.
Saat 11:00 radələrində Nazim Hüseynovun Bakı–Sumqayıt ekspres marşrut xətti üzrə idarə etdiyi “NEOPLAN” markalı avtobus qarşıda gedən Adil Yunusovun idarə etdiyi, 42 nömrəli marşrut xətti üzrə hərəkətdə olan “İSUZU” markalı avtobusla toqquşub.
Toqquşmadan sonra “İSUZU” markalı avtobus yoldan çıxaraq aşıb və nəticədə 18 yaşlı sərnişin Məryəm Ağayeva hadisə yerində həyatını itirib.
Qəza nəticəsində xəsarət alan 19 nəfər isə müxtəlif dərəcəli bədən xəsarətləri ilə Sumqayıt Tibb Mərkəzinin nəzdində olan Təcili Tibbi Yardım Xəstəxanasına hospitalizasiya olunub.
Yaralılardan 2-si reanimasiyaya, 1 nəfəri isə neyrocərrahiyyə şöbəsinə yerləşdirilib. Vəziyyətləri ağır qiymətləndirilir. Digər şəxslərə isə Təcili yardım şöbəsində zəruri tibbi yardımlar göstərilir. Vəziyyətləri orta ağır qiymətləndirilir.
Faktla bağlı araşdırma aparılır.
