Sumqayıtda insanların istirahət etdikləri yerlərdən biri də Lüdviqshafen parkıdır. Park 1997-ci ildə Sumqayıt-Lüdviqshafen (Almaniya) əlaqələrinin 20 illiyi münasibətilə şəhərin 9-cu mikrorayon ərazisində salınıb. Parkın açılışı iki şəhər arasında dostluq əlaqələrinin möhkəmləndirilməsinə xidmət edir.
Artıq 20 ildir ki, burada insanlar istirahət edir, yaşıllıqlar arasında gəzir, uşaqlar isə özlərinə dost tapırlar. Lakin "Azərbaycan" qəzetinə müraciət edən vətəndaş bildirib ki, son illər parka sanki soyuq münasibət yaranıb:
"Biz həmişə qonaqlarımızı bura gətirər, belə bir parkımızın varlığı ilə fəxr edərdik. Hazırda isə burada bəzi yerlər artıq yararsız vəziyyətə düşüb. Oturacaqların sayı da azalıb və olanların da təmirə ehtiyacı var. Üstəlik, parkın işıqlandırılması zəifdir, fəvvarələrin kənarındakı boya örtüyü qoparaq tökülüb. Park Sumqayıt Dövlət Universitetinin yanında yerləşdiyi üçün bura daim tələbələrlə dolu olardı. Hazırda insanların çoxu yaxşı halda parkda yerləşən çayxana və kafelərə üz tutur.
Bir azdan istilər düşəcək və istirahət parkına üz tutmaq istəyənlərin sayı artacaq. Sumqayıtlılar bu parka iki xalqın dostluq rəmzi kimi baxır. Gəlin, heç olmasa, bunun xatirinə parka münasibəti dəyişək".
