“Dostluq” restoranında yoxlama keçirilib.
Sumqayıt24 xəbər verir ki, Yusif Dadaşova məxsus obyekt Corat qəsəbəsində yerləşir. Qida Təhlükəsizliyi Agentliyinin (AQTA) əməkdaşları baxış zamanı burada qida təhlükəsizliyi sahəsində normativ hüquqi aktların tələblərinin pozulduğunu, sanitar-texniki və sanitar-gigiyenik vəziyyətinin qənaətbəxş olmadığını müəyyən ediblər.
Belə ki, müəssisədə mal qonşuluğu prinsipinin pozulduğu, mətbəx sahəsinin təmirsiz olduğu, avtonom havalandırma sisteminin quraşdırılmadığı, müvafiq təmizlik işlərinin görülmədiyi, həmçinin istifadə müddəti bitmiş və markalanması qanunvericiliyin tələblərinə cavab verməyən qida məhsulları aşkarlanıb.
Faktla bağlı müəssisənin fəaliyyəti məhdudlaşdırılıb, cərimə tətbiq olunub.
