Sumqayıtda fəaliyyət göstərən "SOCAR" "Azərikimya" İstehsalat Birliyinin Etilen-polietilen zavodunda yanğın-taktiki təlim keçirilib.
Sumqayit24.az xəbər verir ki, Fövqəladə Hallar Nazirliyinin (FHN) Dövlət Yanğından Mühafizə Xidməti tərəfindən keçirilən təlimin məqsədi qaz məhsulları saxlanılan çənlərdə və açıq texnoloji qurğularda yanğın baş verdikdə əraziyə cəlb olunan yanğından mühafizə bölmələrinin qarşılıqlı fəaliyyətinin daha da təkmilləşdirilməsi və bu kimi obyektlərdə mümkün yanğınların söndürülməsi, həmçinin xilasetmə işlərinin təşkili üzrə şəxsi heyətin peşəkar bacarıqlarının gücləndirilməsi, habelə obyektin aidiyyəti heyətinin yanğınlar zamanı ilkin davranış qaydaları barədə biliklərinin artırılması olub.
Təlim zamanı zavodda baş verən şərti yanğın yerinə operativ çatan Dövlət Yanğından Mühafizə Xidmətinin yanğından mühafizə bölmələri işçilərin "təhlükəli ərazidən" təxliyə edilməsi, "yanğın" yerində çevik kəşfiyyatın aparılması və "yanğının söndürülməsi", FHN-in Sumqayıt Regional Mərkəzinin xilasetmə qrupları isə "zərərçəkmişlərin xilas edilməsi" əməliyyatlarını yerinə yetiriblər.
Uğurla keçirilən təlimdən sonra əldə edilən nəticələr müzakirə olunub, müvafiq tapşırıqlar verilib.
Təlimə FHN-in Dövlət Yanğından Mühafizə Xidməti, Dövlət Yanğın Nəzarəti Xidməti və Sumqayıt Regional Mərkəzinin ümumilikdə 6 ədəd texnikası və 50 nəfərdən ibarət şəxsi heyəti cəlb olunub.
