Azərbaycanda hərbçilərin avqust ayının pensiyasını ala bilmədikləri iddia olunur. Bu haqda 19 avqust tarixində Sumqayıt24 Qafqazinfo.az-a istinadən məlumat verir.
İddiaya görə, hər ayın 15-i hərbçilərin pensiyaları ödənilsə də, bu ay yubanma olub. Avqustun 16-sı Dövlət Sərhəd Xidməti, Daxili Qoşunlarda xidmət etmiş hərbi qulluqçuların pensiyaları verilsə də, digər hərbçilər hələ də pensiya ala bilməyiblər.
Məsələ ilə əlaqədar Dövlət Sosial Müdafiə Fondundan bildirilib ki:
“Pensiyaların ödənişində hər hansı bir gecikmə yoxdur. Respublika üzrə avqust ayının pensiylarının ödənişi davam etdirilir. Avqustun 9-da Bakı və Sumqayıt şəhərləri, eləcə də Abşeron rayonu üzrə, avqustun 15-dən isə respublikanın ayrı-ayrı rayonlarında qeydiyyatda olan pensiyaçıların ödənişləri köçürülüb.
Güzəştli şərtlərlə pensiya alan şəxslərin pensiyalarının maliyyələşdirilməsi başa çatdırılıb. Ödəniş isə banklar vasitəsilə davam etdirilir. Günün sonunadək proses tam başa çatdırılacaq”.
Fonddan həmçinin qeyd edilib ki, avqust ayı başa çatmamış avqust ayının pensiyalarının ödənişi yekunlaşdırılacaq.
