Dünyanın ən iri qapalı su hövzəsi olan Xəzər dənizinin səviyyəsi tsiklik dalğalanmalara məruz qalır.
Bunu Caliber.az-a Elm və Təhsil Nazirliyi nəzdində Həsən Əliyev adına Coğrafiya İnstitutunun Xəzər dənizi şöbəsinin müdiri, professor Əmir Əliyev bildirib.
Professorun sözlərinə görə, 1978-1995-ci illərdə Xəzərin suyunun səviyyəsi yüksəlib, o vaxtdan indiyə kimi isə azalma prossesi gedir.
“Proqnozlara əsasən, suyun səviyyəsinin düşmə prossesi yaxın 10-15 il davam edəcək, təxmini 2040-2050-ci illərdə isə yüksəliş gözlənilir.
Ümumiyyətlə, son 4000 ildə Xəzər dənizinin səviyyəsi təxminən 200-220 il ərzində azalır, sonra isə təxminən eyni vaxt kəsimində yüksəlir. Ən yüksək səviyyə sonuncu dəfə 1805-ci ildə qeydə alınıb. Həmin gündən suyun səviyyəsində azalma müşahidə olunsa da, bəzən cüzi artımlar da qeydə alınır”, - deyə alim bildirib.
Qeyd edək ki, Xəzər dənizinin dayazlaşması gəmiçilik və balıqçılığa böyük ziyan vurur. Ümumiyyətlə, Azərbaycanda dəniz səviyyəsinin aşağı düşməsinə görə sahil xətti 100, 200, 500 metr, bəzi yerlərdə hətta 1 kilometr geri çəkilib.
