Sumqayıtın sabiq məmurunun oğlunun "İdrak" liseyində müəllimini güllələməsi ilə bağlı yeni xəbər yayılıb.
Baş Prokurorluğun "Instagram" səhifəsində canlı yayımda Baş Prokurorluğun Kriminalistika və İnformasiya texnologiyaları idarəsinin rəis müavini, Kriminalistika şöbəsinin rəisi Orxan Rzayev deyib ki, "İdrak" liseyində müəllimin güllələnməsi ilə bağlı silahın sahibi də cinayət təqibinə cəlb olunub.
O bildirib ki, cinayət işi Bakı Ağır Cinayətlər məhkəməsinə göndərilib: "Silahın sahibi ilə də bağlı cinayət təqibi aparılır. Nəticəsi barədə ictimaiyyətə cəmiyyətə məlumat veriləcək".
Qeyd edək ki, hadisə fevralın 6-da Binəqədi rayonunda yerləşən özəl "İdrak" liseyində baş verib.
Məktəbdə şagird odlu silahdan atəş açmaqla müəlliminə xəsarət yetirib. Hadisəni törətməkdə şübhəli bilinən şagird saxlanılıb.
Faktla bağlı Binəqədi rayon prokurorluğunda cinayət işi başlanılıb.
Onu da əlavə edək ki, güllə atan şagirdin atası Samir Şirinov əvvələr Sumqayıt Şəhər İcra Hakimiyyətinin Mənzil Kommunal Təsərrüfat Birliyində rəis müavini vəzifəsində işləyib, hazırda işsizdir.
Mənbə: Apa
