Reabilitasiya mərkəzində pasiyentə xəsarət yetirilib. Sumqayıt24 bu haqda 18 iyul tarixində Apa.az-a istinadən xəbər verir.
Hadisə Novxanı qəsəbəsində yerləşən “Start” reabilitasiya mərkəzində baş verib. Elvin Eyvazov adlı şəxs polisə müraciət edərək bildirib ki, alkoqolizmdən müalicə aldığı müddətdə müəssisənin Emin və Orxan adlı əməkdaşları ona fiziki və psixi təsir göstəriblər, həmçinin orada müalicə alan Şamil onun sifət və qol nahiyəsinə yumruq zərbələri vurub.
Daxili İşlər Nazirliyinin (DİN) mətbuat katibi mayor Anar Qafarov məsələ ilə bağlı açıqlama verib. Onun sözlərinə görə, araşdırma zamanı mərkəzin təsisçiləri, eləcə də adları çəkilən əməkdaşları Emin Əliyev və Orxan Şirinovun izahatları alınıb. Onlar E. Eyvazova psixi və fiziki zor tətbiq etmədiklərini bildiriblər.
Pasiyent Şamil İbrahimov isə həmin gün Eyvazovun aqressiv hərəkətlərinə görə ona irad bildirdiyini və qolundan tutaraq masaya əyləşdirdiyini qeyd edib.
Məhkəmə-tibbi ekspertizası zamanı Elvinin üzərində dərəcəsi təyin olunmayan və sağlamlığa zərər vurmayan xəsarətlər aşkarlanıb. Bu barədə rəy verilib.
Araşdırmaların yekunu olaraq iyunun 17-də Ş. İbrahimovun orada müalicə alan E. Eyvazovun sifət və qol nahiyələrinə xəsarət yetirməsi nəticəsində sağlamlığa zərər vurmayan bədən xəsarəti yetirdiyi sübuta yetirilib.
Onun hərəkətində cinayət tərkibi müəyyən olunmayıb. Toplanmış material üzrə cinayət işinin başlanması rədd edilərək barəsində İnzibati Xətalar Məcəlləsinin 157-ci maddəsində nəzərdə tutulmuş inzibati tənbeh tədbirləri görülüb.
