Qadını şantaj edən şəxsə hökm oxunub.
Sumqayıt24 Pravda.az-a istinadən xəbər verir ki, Sumqayıt Apellyasiya Məhkəməsində hədə-qorxu ilə tələb etmədə təqsirləndirilən Uğur Pənahovun (şərti) apellyasiya şikayəti üzrə məhkəmə yekunlaşıb.
Hakim Elman Əhmədovun sədrliyi ilə keçirilən prosesdə qərar elan olunub. Uğurun şikayəti təmin edilməyib.
İttihama görə, Uğur Pənahov 2022-ci ilin iyul ayında “Instaqram”da zərərçəkmiş İlahə Məmmədova (şərti) ilə tanış olub. Sonra qadına fotolarının altından əxlaqsız məzmunda mətnlər yazıb saytlarında paylaşıb onun barəsində rüsvayedici məlumatlar yayacağı ilə hədə-qorxu gəlib. O, bunun müqabilində zərərçəkmiş şəxsdən 2022-ci ilin avqust-oktyabr aylarında Sumqayıt ərazisində 1400 ABŞ dolları və dəyəri 4080 manat olan qızıl-zinət əşyalarından ibarət əmlakını hədə-qorxu ilə ələ keçirib.
Pənahov qadının şikayəti əsasında saxlanılıb və barəsində həbs qətimkan tədbiri seçilib. Sumqayıt Ağır Cinayətlər Məhkəməsinin hökmü ilə o, 7 il 11 ay 28 gün müddətinə azadlıqdan məhrum edilib.
Hökmdən narazı qalan məhkum apellyasiya şikayəti vermişdi.
