Sumqayıt şəhəri, 49-cu məhəllə, Aşıq İmran küçəsində (keçmiş Novdərə küçəsi) yaşayan sakinlər illərdir həllini tapmayan problemlərlə üz-üzədirlər.
Sumqayit24.az-a müraciət edən vətəndaşlar bildirirlər ki, ərazidə su boruları üzdə qalıb və yay-qış demədən tez-tez partlayır, yaxud avtomobillərin üzərlərindən keçməsi nəticəsində sıradan çıxır. Bu səbəbdən böyük həcmdə su boş yerə axıb gedir:
"Bir tərəfdən əhaliyə suya qənaət çağırışları edilir, digər tərəfdən isə bu cür problemlərə uzun müddətdir ciddi yanaşılmır".
Şikayətdə o da bildirilir ki, məhəllədaxili yollar da acınacaqlı vəziyyətdədir. Xüsusilə yağış yağan kimi küçələr palçıq və gölməçələrlə dolur, hərəkət etmək demək olar ki, mümkünsüz olur. Sakinlərin sözlərinə görə, böyüklər çətinliklə də olsa işə gedə bilirlər, lakin uşaqları bağçaya və məktəbə aparmaq ciddi problemə çevrilir.
Vətəndaşlar indiyə qədər problemi müvəqqəti olaraq öz imkanları ilə həll etməyə çalışıblar. Lakin bu vəziyyətin daimi və əsaslı şəkildə aradan qaldırılmasına ehtiyac var. Onlar aidiyyəti qurumlardan məsələyə ciddi yanaşılmasını və həm su xəttinin, həm də yolların normal vəziyyətə salınmasını tələb edirlər.
