Xəbər verdiyimiz kimi, Sumqayıt sakini Elxan Ağayev 30-cu məhəllədə yaşadığı binanın daxili və xarici fasadına müxtəlif rəsm əsərləri çəkib. Bu təşəbbüs binanın estetik görünüşünə müsbət təsir göstərməklə yanaşı, sakinlər və sosial şəbəkə istifadəçiləri tərəfindən də böyük maraqla qarşılanıb.
Sumqayit24.az-ın əməkdaşı Elxan Ağayevlə həmsöhbət olub. Müsahibəni təqdim edirik:
- Özünüzü təqdim edin, zəhmət olmasa. Elxan Ağayev kimdir?
Maraq göstərdiyiniz üçün minnətdaram. Mən Elxan Ağayev, rəssam-pedaqoqam.
- Binanın divarlarını rəsm əsərinə çevirmək ideyası necə yarandı? İlk dəfə bu fikri sakinlərlə bölüşəndə reaksiyalar necə oldu?
Qısaca desəm, blokumuzun təmizliyi üçün bu qərara gəldim. Hamımıza aid olan məkan daha gözəl və baxımlı olmalıdır. Qonşular da köməklərini əsirgəmədilər, xüsusilə uşaqların sevincinin həddi-hüdudu yox idi.
- Bu təşəbbüsdən sonra başqa bina sakinlərindən və ya qurumlardan sizə müraciət edənlər olubmu?
Bəli, rəsmlərlə bağlı başqa binaların sakinlərindən də təkliflər almışam.
- Rəssam gözü ilə baxdıqda, Sumqayıt sizə necə görünür?
Sumqayıt çox gözəl və potensialı böyük şəhərdir. Dəniz sahilində yerləşməsi onun turizm şəhərinə çevrilməsi üçün geniş imkanlar yaradır.
- Bir rəssam kimi, Sumqayıtı daha canlı və fərqli göstərmək üçün hansı layihələrin həyata keçirilməsini istəyərdiniz?
Məncə, bələdiyyə şəhərin estetik görünüşü ilə bağlı daha ciddi addımlar atmalıdır. Rəssamlar, heykəltəraşlar və memarlarla birlikdə müsabiqələr və tenderlər təşkil olunmalıdır. Öz sənətinə hörmət edən hər bir sənətkar şəhərin gözəlləşməsi üçün təmənnasız iş görməyə hazırdır. Əgər güclü dəstək olsa, qalib layihələri icra hakimiyyətinə təqdim edib həyata keçirmək mümkündür.
