Rus bölməsi ilə bağlı növbəti yenilik gözlənilir.
Sumqayit24.az xəbər verir ki, İctimai TV-də bununla bağlı süjet yayımlanıb. Süjetdə deyilir ki, Azərbaycan tarixi fənninin ana dilimizdə keçirilməsinin növbəti illərdən bütün sinifləri əhatə etməsi planlaşdırılır. Rus dilində keçirilən bəzi fənlərin də ana dilində tədris edilməsi nəzərdən keçirilir.
Elm və Təhsil Nazirliyindən bildirilib ki, bu fənlərin hansılar olacağı və nə vaxtdan başlayacağı hələ planlaşdırılmayıb.
Ekspertlər bildirirlər ki, rus və ingilis bölmələrində tədrisin ən ciddi problemlərindən biri məhz Azərbaycan dilinin gündəlik həyatda az istifadə olunmasıdır.
Mütəxəssislər atılan addımları yüksək qiymətləndirirlər. Lakin rus bölmələrində fənlərin Azərbaycan dilinə tətbiqi şagirdlər üçün müəyyən çətinlik yaradacağını düşünürlər.
Elm və Təhsil Nazirliyindən bildirilir ki, rus bölmələrində Azərbaycan dilində tədris edilən fənlər şagirdlərin bilik və yaş səviyyəsi nəzərə alınmaqla hazırlanır. O da qeyd edilir ki, rus bölmələrində bəzi fənlərin Azərbaycan dilində tədris olunmasında əsas məqsəd şagirdlərin milli-mənəvi dəyərlərə hörmət ruhunda tərbiyə edilməsidir.
