Eks bələdiyyə sədri Sumqayıtda cəzalandırılıb. Sumqayıt24 bu haqda 2 avqust tarixində Pravda.az-a istinadən xəbər verir.
Sumqayıt Ağır Cinayətlər Məhkəməsində rüşvət almada, vəzifə səlahiyyətlərini aşmada və vəzifə saxtakarlığında təqsirləndirilən Yaşar Qafarovun (soyadı şərti) cinayət işi üzrə məhkəmə iclası başa çatıb.
Hakim Aynur Rzayevanın sədrliyi ilə keçirilən prosesdə hökm oxunub. Qərara əsasən, o, 9 il müddətinə həbs edilib.
İttihama görə, Yaşar Qafarov 2015-ci ildən həbs edilənə qədər Qusar rayon Kuzun bələdiyyəsinin sədri olub. O, bu müddət ərzində rüşvət qarşılığında fermerə torpaq sahəsində xırdabuynuzlu heyvanlarını saxlamağa və otarmağa icazə verib.
Qeyd edək ki, Qafarov eyni zamanda, bu il Qusar Rayon Məhkəməsinin hökmü ilə dələduzluq maddələrində təqsirli bilinərək 3 il müddətinə azadlıqdan məhrum olunub.
