Sumqayıtdan keçən su kanalı təhlükə mənbəyinə çevrilib. Bu barədə 20 oktyabr tarixində Sumqayıt24 xəbər verir.
Samur-Abşeron kanalında çox adam batıb, hətta bir neçə gün öncə oraya avtomobil düşüb. Buna baxmayaraq ətrafda nə qoruyucu sədd var, nə də ki xəbərdarlıq lövhələri.
“Meliorasiya və Su Təsərrüfatı” ASC-nin rəsmisi Dilqəm Şərifov bu məsələ ilə bağlı Oxu.az-a açıqlama verib. O, qeyd edib ki, kanal onların balansında olsa da, yollarda mühafizə sədlərinin quraşdırılması kimi səlahiyyətləri yoxdur:
“Sözügedən kanal layihəyə uyğun olaraq açıq tiplidir. Biz hər hansı sədd quraşdırmırıq, üstünü örtmürük, çünki bu kanal lillidir. Texnika yaxınlaşıb lili təmizləyir, ona görə də biz onun ətrafını betonlaya bilmərik. Ümumilikdə isə hər bir kanalın mühafizə zolağı var, mühafizə zolağından sonra yol çəkilir. Həmin hadisə olan yerdə də yol gedir, yoldan sonra 11 metrlik mühafizə zolağı, ondan sonra isə kanaldır. Sədlər yolun kənarından qoyulmalıdır ki, hər hansısa avtomobil sürətlə idarə olunsa belə, kanala düşməsin. Yol isə bizim balansımızda deyil.”.
Qeyd edək ki, həmin yol Sumqayıt şəhər İcra Hakimiyyətinin balansındadır. Qurumun mətbuat katibi Eyvaz Qocayev bildirib ki, aidiyyəti qurumlar qarşısında məsələ qaldırılacaq.
