Sumqayıt Kimya Sənaye Parkında 40 sahibkarlıq subyektinə rezidentlik statusu verilib. Onların ümumi investisiya həcmi 6,2 milyard manatdır. Sumqayıt24 bu haqda 17 iyul tarixində xəbər verir.
Cənubi Qafqazın ən böyük sənaye parkında mediatur olub. İqtisadi Zonaların İnkişafı Agentliyinin (İZİA) şöbə müdiri Kamran Rəhimli jurnalistlərə bildirib ki, Sənaye Parkına indiyədək 5,5 milyard manatdan çox sərmayə yatırılıb, 6800-dək daimi iş yeri yaradılıb:
"Yeni fəaliyyətə başlayacaq iki müəssisədə ümumilikdə 40 milyon manata yaxın investisiya qoyulmaqla 300-dən artıq əlavə iş yeri yaradılacaq".
Şöbə müdiri əlavə edib ki, sənaye parkına mövcud layihələr üzrə əlavə 554 milyon manat investisiyanın yatırılması, 2200-dən çox iş yerinin yaradılması nəzərdə tutulur:
"Bu günədək parkın rezidentləri tərəfindən ümumilikdə 11,6 milyard manatdan çox məhsul satışı həyata keçirilib ki, bunun da 4,1 milyard manatdan çox hissəsi (təxminən 35,3%-i) ixracın payına düşür".
Qeyd olunub ki, bu ilin birinci yarısında Sumqayıt Kimya Sənaye Parkında 1,3 milyard manatlıq məhsul istehsal edilib. Bunun 455 milyon manatlıq hissəsi ixrac olunub.
