Saray körpüsünün aşağı hissəsində yaşayan sakinlər yağışlı havalarda yaranan problemlə bağlı narazılıq edirlər.
Sumqayit24.az-a daxil olan məlumata görə, körpü təmir olunan zaman yağış sularının rahat şəkildə kanala axması üçün xüsusi borular quraşdırılıb. Məqsəd həm körpünün üzərində suyun yığılmasının qarşısını almaq, həm də aşağı hissədə yaşayan sakinlərin istifadə etdiyi yolların su altında qalmamasını təmin etmək olub.
Lakin sakinlərin iddiasına görə, körpünün üzərini təmizləyən işçilər süpürülən zibilləri həmin boruların içinə doldururlar. Nəticədə borular tutulur və yağış suları kanala axmaq əvəzinə birbaşa sakinlərin istifadə etdiyi yola dolur.
Şikayətçilərin məlumatına əsasən, yaranmış vəziyyət həm körpünün konstruksiyasına zərər vurur, həm də ərazidə yaşayan insanların gündəlik hərəkətində ciddi çətinlik yaradır.
Sakinlər aidiyyəti qurumlardan mövcud problemin aradan qaldırılmasını tələb edirlər.
Məsələ ilə bağlı aidiyyəti quruma sorğu ünvanlanıb.
