Xəbər verdiyimiz kimi, Saray qəsəbəsi Heydər Əliyev küçəsində işıq dirəkləri mövcud olsa da, işıqlandırılma təmin edilmir.
Sakinlərin sözlərinə görə, gecə saatlarında küçənin qaranlıq olması həm piyadaların, həm də nəqliyyat vasitələrinin hərəkətində ciddi çətinliklər yaradıb.
Məsələ ilə bağlı Abşeron Rayon İcra Hakimiyyəti açıqlama verib. Qurum bildirib ki, yol kənarlarında yerləşən gecə işıqlandırılması sistemlərinin yerli icra hakimiyyətinin balansına verilməsi istiqamətində həyata keçirilən təhvil-təslim işləri artıq başa çatıb.
"Hazırda bu prosesdə yaranmış fasilədən sonra mövcud texniki məsələlərin aradan qaldırılması istiqamətində müvafiq tədbirlər görülür. Eyni zamanda qeyd edirik ki, rayon ərazisində küçə işıqlandırılması sisteminin müasir tələblərə uyğun qurulması istiqamətində mərhələli işlər davam etdirilir. Artıq Abşeron rayonunun kənd və qəsəbələrində mərkəzləşdirilmiş idarəetmə sistemi (yeni texnologiya əsasında) ilə küçə işıqlandırılması sistemi qurulur. Hazırda Saray qəsəbəsidə daxil olmaqla gecə işıqlandırılması sistemlərinin mərhələli şəkildə bərpası və yenilənməsi işləri həyata keçirilir", - deyə Abşeron Rayon İcra Hakimiyyətinin məlumatında qeyd olunub.
Xatırladaq ki, sözügedən məsələ ilə bağlı şikayət redaksiyamız tərəfindən 2026-ci il iyunun 9-u tarixində işıqlandırlıb.
***
Saray qəsəbəsində küçə işıqlandırılması ilə bağlı şikayət var.
Sumqayit24.az-a daxil olan məlumata görə, Heydər Əliyev küçəsində işıq dirəkləri mövcud olsa da, işıqlandırılma təmin edilmir.
Sakinlərin sözlərinə görə, gecə saatlarında küçənin qaranlıq olması həm piyadaların, həm də nəqliyyat vasitələrinin hərəkətində ciddi çətinliklər yaradır. Belə vəziyyət isə ərazidə qəza riskini artırır.
Bundan əlavə, vətəndaşlar bildirirlər ki, işıq dirəklərindən biri aşıb və günlərdir yerdə qalıb. Bu cür hal isə piyadaların hərəkətinə maneə yaradır.
Vətəndaşlar aidiyyəti qurumlardan mövcud problemlərin aradan qaldırılmasını tələb edirlər.
