Saray qəsəbəsində sahibsiz itlərin hücumu nəticəsində 14 yaşlı yeniyetmə xəsarət alıb.
Musavat.com-un məlumatına görə, hadisə Qasımbəy Zakir küçəsində baş verib.
Belə ki, Turabov Mübariz Amid oğlu velosiped sürərkən bir neçə itin hücumuna məruz qalıb. İtlər yeniyetmənin ayaq və qol nahiyələrini dişləyərək ona ciddi xəsarətlər yetiriblər. Bildirilir ki, heyvanlar azyaşlını parçalamağa cəhd edib.
Hadisə yerində olan sakinlər yeniyetmənin köməyinə çataraq onu itlərin əlindən çətinliklə xilas ediblər.
Məlumata görə, hazırda 14 yaşlı uşaq Sumqayıt şəhərindəki xəstəxanalardan birində müalicə alır. Həkimlər onun vəziyyətini orta ağır qiymətləndirirlər.
Azyaşlının atasının sözlərinə görə, məsələ ilə bağlı Saray Bələdiyyəsinə müraciət edilib. Ona bildirilib ki, sahibsiz itlərin ərazidən uzaqlaşdırılması və ya başqa yerə köçürülməsi üçün bələdiyyənin kifayət qədər vəsaiti yoxdur.
Fakt yerli sakinlər arasında narahatlıq yaradıb. Qəsəbə sakinləri sahibsiz itlərin sayının artdığını və bu səbəbdən xüsusilə uşaqların təhlükə ilə üz-üzə qaldığını bildirirlər. Onlar aidiyyəti qurumları problemin həlli istiqamətində təxirəsalınmaz tədbirlər görməyə çağırıblar.
Saray bələdiyyəsindən bildirilib ki, itlərin sayı qəsəbədə çoxalıb və bələdiyyə onların yığışdırılmasında çətinlik çəkir.
