Saray yaşayış kompleksinin ətrafında sahibsiz itlərin dolaşması sakinlər arasında narahatlığa səbəb olub. Sumqayıt24 ATV News-a istinadən xəbər verir ki, ərazidə gəzən itlər, xüsusilə gecə saatlarında, sakinlərə təhlükə yaratmaqla yanaşı, uşaqlar və ev heyvanları üçün də risklər yaradır. Şikayətçilərin sözlərinə görə, itlərin səsi onları yatmağa da qoymur:
“Hər gün itlər uşaqların dalınca qaçır, onlar da qorxub qaçırlar. Yaxınlaşmasan bəlkə də uşaqları parçalayarlar. Zibil atırdım bir də gördüm uşağın üzərinə hücum etdi. Mən qovdum ki, uşağa heç nə etməsin. Deyirlər itə əl vurmaq, öldürmək olmaz. Axşamlar səslərindən yatmaq olmur”.
Şikayətçilər bildirib ki, bir müddət əvvəl itlərin həmin əraziyə toplanma səbəbi kimi, tullantı qabların evlərə yaxın ərazidə olması göstərilirdi. Lakin artıq bu problem də öz həllini tapıb. Gündəlik olaraq konteynerlər təmizlənir və daşınır. Onlar problemin tezliklə həll olunmasını istəyirlər.
Məsələ ilə bağlı Abşeron Rayon İcra Hakimiyyətindən (RİH)-dən bildirilib ki, “Sahibsiz heyvanlara qayğı mərkəzi” layihəsi hazırlanıb. Layihənin smeta xərcləri müəyyən edilib və tikinti üçün maliyyə vəsaiti ayrılıb:
“Mərkəzin tikintisinin aparılacağı torpaq sahəsi də müəyyən edilib. Hazırda həmin torpaq sahəsinin sənədləşmə işləri həyata keçirilir. Sənədləşmə işləri yekunlaşandan sonra isə mərkəzin tikintisinə başlanılacaq”.
