Sumqayıt Dövlət Universiteti və Dövlət Məşğulluq Agentliyinin birgə təşkilatçılığı ilə "Karyera Körpüsü: Diplomdan peşəkarlığa ilk addım" adlı Karyera Sərgisi və Əmək Yarmarkası keçirilib.
Tədbirdə dövlət qurumları, iri şirkətlər, sənaye müəssisələri və bank sektorunun nümayəndələri iştirak ediblər. Yarmarkada tələbə və məzunlara müxtəlif vakansiyalar və təcrübə proqramları təqdim olunub.
SDU-nun rektoru professor Nurəli Yusifbəyli bildirib ki, universitetin əsas məqsədi tələbələri əmək bazarının tələblərinə uyğun praktiki bilik və bacarıqlarla hazırlamaqdır. O, rəqəmsallaşma və süni intellektin iş dünyasında yeni tələblər formalaşdırdığını vurğulayıb.
Dövlət Məşğulluq Agentliyinin İdarə Heyətinin sədri Hasil Abbasov isə qeyd edib ki, bu cür əmək yarmarkaları gənclərin iş tapmasına və işəgötürənlərin ixtisaslı kadrlarla təmin olunmasına mühüm töhfə verir.
Qeyd edək ki, tədbir çərçivəsində 60-dan çox şirkət və qurum öz vakansiya və təcrübə proqramlarını təqdim edib.
