Sumqayıt Dövlət Universitetinin (SDU) Kimya mühəndisliyi və ekologiya kafedrasının müdiri, dosent Tünzalə Babayeva və kafedranın dosenti Azadə Əliyeva Çin Xalq Respublikasının Heksi Universitetində keçirilən iki həftəlik elmi-tədqiqat mübadilə proqramında iştirak edirlər.
Sumqayit24.az xəbər verir ki, proqramın məqsədi beynəlxalq elmi əməkdaşlığın genişləndirilməsi, birgə tədqiqat imkanlarının inkişaf etdirilməsi və müasir laboratoriya təcrübələrinin mənimsənilməsidir. Səfər çərçivəsində Heksi Universitetinin Kimya və kimya mühəndisliyi fakültəsinin rəhbərliyi və professor-müəllim heyəti ilə görüş keçirilib. Görüşdə Sumqayıt Dövlət Universitetində, xüsusilə Kimya mühəndisliyi və ekologiya kafedrasında aparılan elmi tədqiqat istiqamətləri təqdim olunub.
Müzakirələr zamanı suyun fotoelektrokatalizi üçün fotoelektrod materiallarının hazırlanması, onların fiziki-kimyəvi və struktur xüsusiyyətlərinin öyrənilməsi sahəsində aparılan tədqiqatlar qarşı tərəfin xüsusi marağına səbəb olub.
Qeyd edilib ki, bu istiqamətdə aparılan araşdırmalar yaşıl hidrogen energetikasının inkişafı və ətraf mühitin mühafizəsi baxımından mühüm elmi əhəmiyyət daşıyır. Torpaq və suvarma suları üzrə həyata keçirilən müasir tədqiqatlar da iştirakçılar tərəfindən yüksək qiymətləndirilib. Mübadilə proqramı çərçivəsində Azərbaycanda sintez edilmiş və ilkin xüsusiyyətləri müəyyənləşdirilmiş materiallar üzərində dərin laborator analizlər aparılır. Tədqiqatlarda SEM (Scanning Electron Microscope), XRD (X-Ray Diffraction), FTIR (Fourier Transform Infrared Spectroscopy) və NMR (Nuclear Magnetic Resonance) kimi müasir elmi avadanlıqlardan istifadə olunur. Artıq Ag₈SnSe₆ maddəsinin SEM cihazında aparılan ilkin tədqiqatları uğurla başa çatdırılıb. Əldə olunan nəticələr materialın səth morfologiyası və mikrostruktur xüsusiyyətləri barədə mühüm elmi məlumatlar təqdim edib. Bu nəticələr fotoelektrod materiallarının tətbiq imkanlarının genişləndirilməsi və gələcək tədqiqatların inkişafı baxımından əhəmiyyətli hesab olunur.
