Sumqayıt Dövlət Universitetinin professoru Beynəlxalq Astronavtika Konqresində iştirak edib. Bu barədə 6 oktyabr tarixində Sumqayıt24 xəbər verir.
Sayca 73-cü olan bu konfrans Fransada Paris Konqres Mərkəzində keçirilib. Buraya 90-a yaxın ölkədən 6500-dən çox nümayəndə qatılıb. Onların arasında Fizika və onun tədrisi metodikası kafedrasının professoru, Fizika İnstitutunun Kosmik şüa mənbələrinin fizikası laboratoriyasının rəhbəri, AMEA-nın müxbir üzvü, fizika-riyaziyyat elmləri doktoru Vəli Hüseynov da olub.
Vəli Hüseynov konqresdə “Kosmik relikt neytrino siqnallarının detektə olunmasının mümkünlüyü və relikt neytrino teleskopunun qurulmasına doğru qapı” mövzusunda məruzə ilə çıxış edib. Bu elmi təqdimat Proqram komitəsi tərəfindən baxılıb və 800-dən artıq elmi işin arasından seçilmiş ən yaxşı 80 işə daxil edilib.
Qeyd edək ki, Beynəlxalq Astronavtika Federasiyasının növbəti konqresi 50 ildən sonra yenidən Azərbaycanda keçiriləcək.
