Bu gün şəhid jurnalist Sirac Abışovun anım günüdür.
Sirac Abış oğlu Abışov 29 avqust 1989-cu ildə Qubadlı rayonunun Dondarlı kəndində anadan olub. 1996-2007-ci illərdə Sumqayıt şəhəri 40 nömrəli məktəbdə təhsil alıb. Sonra Azərbaycan Dəniz Balıq Sənayesi Texnikumuna daxil olub, 2009-cu ildə Gömrük ekspertizası ixtisası üzrə tam kursu bitirib.
Media sahəsinə olan marağı onu 2010-cu ildə "Azərbaycan Dövlət Televiziyası və Radiosu" QSC-yə gətirir. Bir müddət "Yurd TV"də, 2020-ci ilin noyabr ayından isə Xüsusi Çəkiliş Qrupunun tərkibində ordumuzun nəzarətinə keçən Ağdam, Füzuli, Cəbrayıl, Zəngilan, Qubadlı, Hadrut, Xocalı, və Xocavənd rayonlarının bütün ərazilərində dövlət əhəmiyyətli çəkilişlər edib.
Növbəti çəkiliş 4 iyun 2021-ci ildə Kəlbəcərdə, Susuzluq kəndindən başlayacaqdı. Lakin heyəti daşıyan "KamAZ" kəndə daxil olanda ermənilərin basdırdığı tank əleyhinə minaya düşür. Nəticədə Sirac Abışov, AZƏRTAC-ın müxbiri Məhərrəm İbrahimov, habelə Kəlbəcər Rayon İcra Hakimiyyətinin nümayəndəsi Arif Əliyev şəhid olublar, daha 4 nəfər isə yaralanıb.
Abışov Sumqayıt Şəhidlər xiyabanında torpağa tapşırılıb. Prezident İlham Əliyev Siracı ölümündən sonra "3-cü dərəcəli "Vətənə xidmətə görə" ordeni ilə təltif edib.
