Yolun hərəkət istiqamətində uşaqlar üçün nəzərdə tutulmuş pultla idarəolunan maşın sürən şəxs həbs edilib.
Qaynarinfo.az-ın məlumatına görə, hadisə Bakının Qaradağ rayonu, Lökbatan qəsəbəsi, 28 may küçəsində yerləşən "Qaradağ" şadlıq sarayının qarşısında baş verib.
Belə ki, 1993-cü il təvəllüdlü Sumqayıt şəhər sakini R.Hafiz oğlu gecə saat 02:30 radələrində yolun hərəkət istiqamətində oyuncaq maşını pult vasitəsilə idarə edib. Polis əməkdaşları ona irad bildiriblər. Həmin şəxsin hadisəni içkili halda törətdiyi məlum olub.
Onun barəsində protokol tərtib edilərək, məhkəməyə göndərilib. R.Hafiz oğlu məhkəmədə əməlindən peşman olduğunu bildirib və barəsində yüngül cəza tədbirinin görülməsini xahiş edib.
Məhkəmənin hökmü ilə təqsirləndirilən şəxs İnzibati Xətalar Məcəlləsinin 510.1-ci maddəsi ilə (xırda xuliqanlıq) nəzərdə tutulmuş inzibati xətanı törətməkdə təqsirli bilinib və 8 gün həbs olunub.
