Yay mövsümünün rəsmən başlamasına və havaların kəskin qızmasına baxmayaraq, Sumqayıt sakinlərinin və şəhərə gələn qonaqların üz tutduğu dənizkənarı çimərliklərin vəziyyəti acınacaqlı haldadır. Sumqayit24.az redaksiyasına daxil olan növbəti vətəndaş şikayəti də məhz bu sahədəki ciddi baxımsızlıq və antisanitariya problemlərini ortaya qoyur.
Şikayətçi mövcud mənzərəni kəskin tənqid edərək bildirib:
"Dənizkənarı çimərliklərin halı belədir. Dövlət qurumları heç olmasa bir özlərini göstərsinlər, TV qarşısında baxış eləsinlər, görsünlər nə biabırçı vəziyyətdir. Hindistanın Qanq çayının ətrafına oxşayır — orada inəklər ətrafı gübrələyir, burada atlar."
Redaksiyamıza təqdim olunan fotolardan aydın görünür ki, çimərlik ərazisində heç bir hazırlıq və ya təmizlik işləri aparılmayıb. Qumun üzərində tikinti materiallarının qalıqları, sınmış taxta parçaları və baxımsız qalan kabinələr xaotik mənzərə yaradır.
Mövsümün qızğın vaxtında şəhər çimərliklərinin bu vəziyyətdə olması həm sakinlərin narazılığına səbəb olur, həm də Sumqayıtın ümumi infrastruktur imicinə kölgə salır. Vətəndaşlar aidiyyəti dövlət qurumlarını və ekoloji nəzarət orqanlarını çimərliklərdə monitorinqlər aparmağa, ərazini heyvanların təbii tullantılarından və zibildən təmizləməyə, həmçinin vətəndaşların təhlükəsiz və gigiyenik istirahətini təmin etməyə çağırır.
