Samur-Abşeron kanalının Ceyranbatan qəsəbəsindən keçən hissəsində yaşayan sakinlər ərazidə təhlükəsizlik tədbirlərinin görülməməsindən şikayətçidirlər.
Baku TV-nin məlumatına görə, ərazidə 100-ə yaxın ailə yaşayır. Onlar su kanalının ətrafına çəpərlərin çəkilməməsindən narazıdırlar.
Şikayətçilər iddia edirlər ki, aidiyyəti qurumlara dəfələrlə müraciət etsələr də, problem həllini tapmır:
“Uşaqlar yayda burada oynayırlar. Dəfələrlə ayaqları sürüşüb yıxılıblar. Keçən dəfə 70 yaşlı qadın nəvəsinin topunu götürmək istəyəndə sürüşüb kanala düşmüşdü. Onu çətinliklə çıxara bildim”, – deyə şikayətçi Şərafət İsayev söyləyib.
Məsələ ilə bağlı Abşeron Su Meliorasiya Sistemlərinin İstismarı İdarəsinin baş mühəndisi Ramil İbadov bildirib ki, əsaslı təmir zamanı layihədə sözügedən su kanalının çəpərlənməsi nəzərdə tutulmamışdı. Həmçinin ərazidəki tikililər də qeyri-qanunidir.
