Sumqayıtdan yeni qrafiklə saat 07:48-də Bakı istiqamətinə hərəkət edən ekspres qatarında böyük sıxlıq yaranıb. Sərnişinlər ayaq üstə qalıb və böyük narahatlıq keçirib.
Afn.az-a sərnişinlərin verdiyi məlumata görə, Sumqayıt stansiyasından qatara minəndə dispetçerlər bildirib ki, qarşı vaqonda boş yerlər var:
"Təsəvvür edin ki, əslində isə boş yerlər dedikləri ayaqüstü yerlər imiş. Bu sıxlıq Xırdalan və Biləcəri stansiyalarında pik həddə çatdı".
Məlum olub ki, qatarın vaqonlarının sayı xeyli azaldılaraq 11-dən 7-yə endirilib:
"Özü də bunu məhz həftənin əvvəli, bazar ertəsi ediblər. Maraqlıdır ki, buna qədər vaqon sayındakı qeyri-stabillik əsasən cümə günləri və bayramlar öncəsi olurdu. Daha əvvəl Sumqayıt sakinlərinə qarşı bu haqsızlığa rayonlara səfər edənlərin say çoxluğu, yüksək tələbatla haqq qazandırırdılar. Bəs bu gün - həftənin əvvəli nə baş verdi?
Ümumiyyətlə, nə üçün istədikləri vaxt vaqon sayını azaldıb bölgələrə hərəkət edən qatarlara qoşmalıdırlar?! Məgər Sumqayıtdan Bakıya hərəkət edənlər pulunu ödəyib rahatlıq istəyən sərnişinlər deyil? Nə üçün öncədən birdəfəlik elan edilmir ki, məsələn, ekspres qatarında vaqonlar azalacaq, daha 7 vaqon olacaq, agah olun! Sərnişinlər bunu əvvəldən bilib ya Pirşağı qatarına minmək üçün yeraltı keçid istiqamətində hərəkət etsinlər, yaxud vağzala gəlmə zamanlarını digər reyslərə uyğun planlasınlar".
Sərnişinlər bildirirlər ki, problemlər bununla bitmir:
"Daha betəri isə budur ki, Sumqayıtdan Xırdalan yolu ilə Bakı istiqamətində sürət qatarlarında vaxtilə 07:25, 07:35, 07:45, 08:00 kimi daha praktik reyslər olsa da, hazırda onların hər biri tarixin yaddaşına qovuşub. Əvvəllər təhlükəsizlik baxımından platforma ilə qatarın ensiz olması səbəbindən arada boşluq olduğu üçün pandus da qoyurdular. Daha bunu da yığışdırdılar. Artıq bu "ekspreslər" sıxlığına və narahatlığına görə 90-cı illərdə Sumqayıt-Bakı yolu işləyən "PAZ" avtobuslarını xatırladır. Görəsən, biz keçmişə qayıdırıq, ya inkişaf etmək istəyirik? Bəlkə bu qərarı verənlər nostalji yaşamaq istəyirlər?”
