Sumqayıt Bələdiyyəsi vergi ödənişləri ilə bağlı yaranan suallara cavab verib.
Qurumun mətbuat katibi Nizami Rəsulov Sumqayit24.az-a açıqlamasında deyib ki,
fiziki şəxslərin əmlak vergisi Azərbaycan Respublikasının Vergi Məcəlləsinə uyğun olaraq hesablanır və bələdiyyələr tərəfindən toplanır:
"Verginin hesablanmasına gəldikdə, yaşayış sahəsinin ilk 30 kvadratmetri üçün dövlət tərəfindən güzəşt tətbiq olunur və həmin hissəyə görə vergi tutulmur. 30 kvadratmetrdən artıq olan sahə üçün isə hər kvadratmetrə görə 0,30 manat məbləğində vergi hesablanır. Qanunvericiliyə uyğun olaraq bəzi kateqoriyalara əlavə güzəştlər də tətbiq edilir. Belə ki, pensiyaçılar, eləcə də qanunla müəyyən edilmiş digər şəxslər üçün 30 manat məbləğində azadolma nəzərdə tutulur. Lakin əmlak kirayəyə verildikdə və ya sahibkarlıq (kommersiya) məqsədilə istifadə olunduqda bu güzəştlər tətbiq edilmir.
Vergi öhdəliyinin yerinə yetirilməsi müddətləri də qanunvericiliklə müəyyən olunub. Əmlak və torpaq vergisi üzrə ödənişlər 15 noyabr tarixinədək həyata keçirilməlidir. Həmin tarixədək ödəniş aparılmadıqda, yaranmış vergi borcuna görə hər gecikdirilmiş gün üçün 0,1 faiz məbləği hesablanır.
Vergi borcu ödənilmədikdə isə məsələ İnzibati icraat haqqında Qanun-a uyğun olaraq inzibati icraat mərhələsinə keçir və qanunvericilikdə nəzərdə tutulmuş qaydada müvafiq tədbirlər görülür. Vergi borcu uzun müddət ödənilmədikdə isə məsələ inzibati icraat mərhələsinə keçir. Bu zaman bələdiyyə tərəfindən borclu şəxsə rəsmi bildiriş göndərilir və borcun könüllü qaydada ödənilməsi tələb olunur.Əgər borc yenə də ödənilməzsə, "İnzibati icraat haqqında" Qanuna uyğun olaraq məcburi icra tədbirlərinə başlanılır. Bu tədbirlərə aşağıdakılar daxildir:
- borcun məhkəmə qaydasında tələb edilməsi;
- icra sənədi əsasında borcun məcburi tutulması;
- borclunun bank hesablarına yönəlmə;
- əmək haqqından və digər gəlirlərdən tutulmalar;
- zəruri hallarda əmlaka yönəlmiş icra tədbirləri.
Bu səbəbdən vətəndaşların vergi öhdəliklərini vaxtında yerinə yetirməsi həm əlavə faizlərin yaranmaması, həm də hüquqi məsuliyyətə cəlb olunmamaq baxımından xüsusi əhəmiyyət daşıyır.
Vətəndaşlara tövsiyə olunur ki, əlavə maliyyə öhdəlikləri və hüquqi məsuliyyət yaranmaması üçün vergi ödənişlərini müəyyən olunmuş müddətlərdə həyata keçirsinlər…"
