Sumqayıt şəhəri Hacı Zeynalabdin qəsəbəsində yerləşən 6 saylı tam orta məktəbdə Azərbaycan Milli Elmlər Akademiyası, Azərbaycan Respublikası Mədəniyyət Nazirliyi və Abşeron-Xızı Regional Təhsil İdarəsinin birgə təşkilatçılığı ilə "Məktəb, elm və ədəbiyyat" layihəsinin növbəti görüşü keçirilib.
Sumqayit24.az xəbər verir ki, deputat Elnarə Akimovanın ideya müəllifliyi və təşəbbüsü ilə həyata keçirilən tədbirdə məktəblilərin rəsm əsərləri sərgilənib. Daha sonra alimlər və yazarlar məktəb kitabxanasına kitablar hədiyyə etdilər.
Görüşdə AMEA-nın prezidenti, akademik İsa Həbibbəyli, Sumqayıt şəhər təhsil sektorunun müdiri İman Ağayev, Milli Məclisin deputatları Elnarə Akimova və Mehriban Vəliyeva, Mədəniyyət Nazirliyinin Azərbaycan dili və ədəbiyyatı siyasəti şöbəsinin müdiri Vasif Qurbanzadə, Sumqayıt Şəhər İcra Hakimiyyəti başçısının Hacı Zeynalabdin qəsəbəsi üzrə nümayəndəsi Lalə Hacıyeva, AMEA Nizami Gəncəvi adına Ədəbiyyat İnstitutunun "Uşaq ədəbiyyatı" şöbəsinin əməkdaşları, uşaq yazarları Rafiq Yusifoğlu, Reyhan Yusifqızı, Sevinc Elsevər, Əziz Sultan, şairlərdən İbrahim İlyaslı və Elvin Əlizadə iştirak ediblər.
Azərbaycan Milli Elmlər Akademiyasının prezidenti, akademik İsa Həbibbəyliyə çıxışında uşaqlıq xatirələrinə qayıdaraq ilk dəfə dörd yaşında "Göyərçin" jurnalını oxuduğunu və həmin jurnalın onda mütaliəyə böyük maraq yaratdığını bildirib. Bu etiraf məktəblilər tərəfindən maraqla qarşılanıb.
Layihənin rəhbəri Elnarə Akimova çıxışında "Məktəb, elm və ədəbiyyat" layihəsinin yaranma məqsədindən və onun əsas ideya xəttindən geniş bəhs edib. O bildirib ki, layihənin başlıca hədəfi region məktəblərində mütaliə mühitini gücləndirmək, uşaqları yazıçı və alimlərlə birbaşa ünsiyyətə gətirmək və kitabı yenidən gündəlik həyatın vacib bir hissəsinə çevirməkdir.
