Sumqayıtda yol polisi profilaktik tədbir keçirib.
Sumqayıt24 xəbər verir ki, piyada keçidindən düzgün istifadə etməyən şəxslərlə maarifləndirici söhbətlər aparılıb, piyadalar və digər hərəkət iştirakçılarına yol hərəkəti qaydalarına riayət etməyin vacibliyindən danışılıb.
Keçidlərdə insanlara yol verməyən sürücülər, nəqliyyatın intensiv olduğu küçələrdə hərəkət edən velosipedçilər, təhlükəsizlik qaydalarına əməl etmədən motosiklet və moped sürən şəxslər də müəyyən ediliblər.
Həmçinin avtomobili narkotiklərin təsiri altında idarə edən sürücülər də aşkar olunublar. Onlar barəsində toplanan materiallar hüquqi qiymət verilməsi üçün məhkəməyə göndərilib. Nəqliyyat vasitəsini sərxoş vəziyyətdə idarə edən, kobud qayda pozuntularına yol verən, nəqliyyat vasitəsinin konstruksiyasında dəyişikliklər edən, sürücülük hüququ olmadan sükan arxasına əyləşən sürücülər də yol polisləri tərəfindən saxlanılıblar. Həmin şəxslər barəsində inzibati protokollar tərtib edilib.
Qeyd edək ki, cari ilin əvvəlindən Sumqayıtda yol hərəkəti qaydalarının pozulması ilə bağlı 58 min 62 inzibati protokol tərtib olunub. Bunlardan 156-sı avtomobili sərxoş vəziyyətdə, 102-si narkotiklərin təsiri altında idarə edən, 199-u piyadalara yol verməyən, 11-i avtoxuliqanlıq edən, 5003-ü üfüqi nişanlama xəttinin tələblərini pozaraq sola və geriyə dönmə qaydalarını pozan sürücülər təşkil edib.
Həmçinin, yol hərəkəti qaydalarını pozan 303 piyada barəsində də protokol tərtib edilib.
