Sumqayıt çimərliklərində antisanitar vəziyyət narazılıq doğurur. Bununla bağlı Sumqayit24.az-a müraciət edən şəhər sakini dəniz kənarında qarşılaşdığı mənzərəni əks etdirən görüntüləri təqdim edib.
O, demək olar ki, hər gün dəniz sahilinə getdiklərini və hər dəfə ərazinin müxtəlif növ tullantılarla çirkləndirildiyini bildirib. Son günlər isə əllərinə zibil torbaları alaraq başqalarının atdığı tullantıları toplamağa başlayıblar.
Sakin qeyd edib ki, sahildə əsasən siqaret kötükləri, şüşə və plastik tullantılar üstünlük təşkil edir:
"Biz əlimizdən gələni etdik. Şəkildə görünəndən qat-qat artıq zibil yığmışıq. Söhbət təkcə bizdən getmir. Belə insanlar olduqca dəniz kənarına getməkdən adam iyrənir. Yemək yeyirlər, sonra bütün zibilləri olduğu kimi qoyub gedirlər."
Vətəndaş dəniz sahillərində təmizliyə riayət olunmasının vacibliyini vurğulayaraq istirahətə gələn hər kəsi tullantıları xüsusi zibil qutularına atmağa və ətraf mühitə məsuliyyətlə yanaşmağa çağırıb.
