Xəbər verdiyimiz kimi, Sumqayıt şəhəri, 14-cü məhəllədə yaşayan sakinlər, binaya çox yaxın məsafədə yeni bir tikilinin inşa edildiyini bildirirlər.
Bu tikili, uşaqların oynaması üçün ayrılan yerin zəbt edilməsinə, həmçinin evlərə düşən günəş işığının qarşısının alınmasına səbəb olur. Xüsusilə birinci mərtəbədə yaşayanlar çox çətinlik çəkəcək, çünkü yeni tikilən bina onların yaşadığı binadan hündür olacaq. Həmçinin ərazidə çox sayda ağacın kəsildiyi iddia olunur.
“Sumqayıt” MMC tikinti şirkətinin direktor müavini İsgəndər Abdullayev isə Xezerxeber.az-a açıqlamasında bildirib ki, hazırda ərazidə yalnız ilkin hazırlıq işləri aparılır və heç bir tikinti başlamayıb.
O, həmçinin ərazidə bütün işlərin qanunvericiliyə uyğun şəkildə həyata keçiriləcəyini vurğulayıb.
Sumqayıt Şəhər İcra Hakimiyyətindən isə bildirilib ki, sözügedən əraziyə artıq baxış keçirilib və tikinti işlərinin aparılmadığı müəyyən olunub. Digər iddialar isə araşdırılacaq.
