Böhtan və təhqir maddələri ilə xüsusi ittiham qaydasında məhkəməyə verilən "Şərur MTK"nın, habelə Sumqayıt şəhəri və Saray qəsəbəsində də tikilmiş "Jasmine Park" yaşayış komplekslərinin sahibi İsfəndiyar Axundovun ("Şərurlu İsfəndiyar") növbəti məhkəmə prosesi keçirilib.
Oxu.az-ın məlumatına görə, hakim Vüsal Tağıyevin sədrlik etdiyi prosesdə iş adamı ilə bağlı növbəti rəy məhkəməyə təqdim olunub.
Məhkəmədə ekspert Nəzakət Qaziyeva işlədilən bütün söz və ifadələrin ədəbi dilə uyğun olduğunu bildirib:
"Linqvistik ekspertizada təqdim edilmiş kəskin fikirlər tənqidi dəyərləndirilə bilər, təhqir səviyyəsi daşımır. Yəni nitq vahidləri emosional olsa da, təhqir hesab edilmir".
Qarşı tərəfin vəkili Asim Abbasov rəyə münasibət bildirərək onun mötəbər sübut kimi qəbul olunmasına etiraz edib:
"Etirazımızın səbəbi odur ki, dilçilik institutunun 2021-ci ildə təyin olunan hazırkı rəhbəri, AMEA-nın həmin vaxt rəhbəri olmuş şəxslə və İsfəndiyar Axundov arasında əlaqənin mövcudluğunu ehtimal edərək bununla bağlı etiraz edirik".
Qeyd edək ki, sözügedən vaxtda AMEA-nın prezidenti Ramiz Mehdiyev olub.
Prosesə sədrlik edən hakim vəkilin etirazını yazılı şəkildə təqdim etməsini istəyib.
Növbəti proses dekabrın 15-nə təyin edilib.
Xatırladaq ki, İsfəndiyar Axundov iş adamı Emin Səməndərovun ünvanına təhqiramiz ifadələr işlətdiyi üçün qarşı tərəfdən xüsusi ittiham qaydasında şikayət edilib. Onun barəsində Cinayət Məcəlləsinin 147.2-ci (böhtan) və 148-ci (təhqir) maddələri üzrə xüsusi ittiham qaydasında məhkəməyə verilib.
