Sumqayıtda yaşayış binalarından birində sakinlər zirzəmidə yığılan suların yaratdığı problemlə bağlı narazılıq edirlər.
Sumqayit24.az-a daxil olan məlumata görə, Kimyaçılar qəsəbəsində, şəhid Səbuhi Həsənquliyev adına küçədə yerləşən 6 saylı binanın zirzəmisində 30 ildən artıqdır ki, qrunt suları toplanır.
Sakinlər bildirirlər ki, bununla bağlı müxtəlif vaxtlarda aidiyyəti qurumlara dəfələrlə müraciət etsələr də, problem bu günədək tam həllini tapmayıb.
Vətəndaşların sözlərinə əsasən, son günlər müşahidə olunan intensiv yağışlardan sonra vəziyyət daha da ağırlaşıb. Belə ki, zirzəmidə yığılan qrunt sularına kanalizasiya suları da qarışıb və nəticədə suyun səviyyəsi xeyli yüksəlib.
Bildirilir ki, su artıq binanın birinci mərtəbəsində yerləşən bəzi mənzillərə qədər çatıb, yaşayış sahələrində rütubət və digər problemlər yaradıb. Sakinlər yaranmış vəziyyətin həm sanitar-gigiyenik baxımdan təhlükə yaratdığını, həm də binanın texniki vəziyyətinə mənfi təsir göstərdiyini deyirlər.
Sakinlər aidiyyəti qurumlardan əraziyə baxış keçirilməsini və problemin aradan qaldırılmasını tələb edirlər.
