Sumqayıtda Niyazi küçəsində, 17-ci və 10-cu mikrorayonları birləşdirən yolda kanalizasiya xəttində yaranmış problem səbəbindən yolun çökməsi ilə bağlı Sumqayit24.az daha əvvəl xəbər vermişdi.
Hadisədən sonra sözügedən yol bir müddət hər iki istiqamətdə nəqliyyatın hərəkəti üçün bağlanmışdı. Sonradan isə yalnız bir hərəkət zolağı istifadəyə verilib.
Hazırda kanalizasiya xəttində aparılan təmir işlərinin başa çatdığı görünsə də, yolun tam bərpası hələ də həyata keçirilməyib. Nəzərə alsaq ki, bu yol şəhərin intensiv nəqliyyat axınının olduğu əsas küçələrdən biridir, mövcud vəziyyət sürücülər və sakinlər üçün əlavə çətinliklər yaradır.
Vətəndaşlarda isə belə bir sual yaranır: mövcud vəziyyət nə vaxta qədər davam edəcək? Onların gündəlik həyatına mənfi təsir göstərən bu problem nə zaman tam həll olunacaq?
Xatırladaq ki, redaksiyamız tərəfindən sözügedən ərazidə yolun çökməsi ilə bağlı xəbər 15 may tarixində işıqlandırılıb.
