Sumqayıtda yollardan birində xətlənmə ilə bağlı narazılıqlar var.
Sumqayit24.az-a daxil olan məlumata görə, problem şəhərin Sülh prospekti ilə Səməd Vurğun küçəsinin kəsişməsində müşahidə olunur.
Bildirilib ki, ərazidə əvvəlcədən həm sağa, həm də sola dönmə istiqamətini göstərən yol nişanlanma xətləri çəkilib. Lakin 1.1 xəttinin daxilində yalnız sağa dönmə istiqaməti göstərilib.
Sürücülərin sözlərinə görə, nişanlanma xətti son anda göründüyü üçün hərəkət zolağını dəyişmək mümkün olmur və nəticədə avtomobillər məcburən sağa dönür. Bu isə sürücülər arasında çaşqınlıq yaradır.
Vətəndaşlar aidiyyəti qurumlardan sözügedən ərazidə yol nişanlanma xətlərinin aydınlaşdırılmasını və problemin aradan qaldırılmasını xahiş edirlər.
