Sumqayıtda 10-cu mikrorayonda kanalizasiya təmirindən sonra yolların bərpa edilməməsi barədə şikayət var.
Sumqayit24.az-a daxil olan məlumata görə, sözügedən ərazidə mart ayında yağan güclü yağışlardan sonra kanalizasiya xətlərinin dağılması nəticəsində ciddi çökmələr meydana gəlmişdi. Məsul qurumlar da həmin problemlərin aradan qaldırılması istiqamətində işlər aparıb və çökmələrə səbəb olan nasazlıqlar aradan qaldırılıb.
Lakin sakinlərin əsas narazılığı təmir işlərindən sonrakı vəziyyətlə bağlıdır. Belə ki, kanalizasiya xətləri bərpa edildikdən sonra qazılmış ərazilər asfaltlanmayıb. Bunun əvəzinə, çökəkliklər iri daş parçaları ilə doldurularaq ərazi tərk edilib.
Nəticədə həm piyadaların, həm də nəqliyyat vasitələrinin hərəkətində problemlər yaranır. Xüsusilə də yağışlı havalarda palçıq, su yığıntıları və daşlı səth piyadaların hərəkətini çətinləşdirir, nəqliyyat vasitələrinin istismarına da mənfi təsir göstərir.
Sakinlər məsul qurumlardan kanalizasiya xətlərinin təmirindən sonra yolların da operativ şəkildə asfaltlanmasını və ərazilərin tam bərpa olunmasını tələb edirlər.
Xatırladaq ki, 14 aprel tarixində həmin ərazidə yarımçıq qalan təmir işləri ilə bağlı şikayət işıqlandırılıb.
