Abşeron Rayon Məhkəməsində Sumqayıtda fəhlə işləyən şəxsin ölümü ilə nəticələnən yol qəzasını törətməkdə təqsirləndirilən Vasif Nuriyevə hökm oxunub.
Hakim Abusət Qasımovun sədrliyi ilə keçirilən prosesdə o, 3 il 6 ay müddətinə azadlıqdan məhrum edilib.
Hadisə 2025-ci ildə Bakı-Quba-Dağıstan sərhəd yolunun Abşeron rayonu ərazisindən keçən hissəsində baş verib. Vasif Nuriyev idarə etdiyi yük avtomobili ilə hərəkətdə olarkən diqqətsizlik səbəbindən yolun sağ zolağında nasazlıq səbəbindən dayanmış, arxasında "qəza dayanacağı" nişanı qoyulmuş minik avtomobilinə arxadan çırpılıb.
Zərbənin təsirindən avtomobilin qarşısında olan piyada Rəhim Musayev ağır kəllə-beyin travması alıb və müalicə aldığı Bakı şəhər Kliniki Tibbi Mərkəzdə vəfat edib.
Məhkəmədə təqsirləndirilən şəxs özünü təqsirli bildiyini, hadisədən peşman olduğunu deyib. O, mərhumun ailəsi ilə barışıq əldə olunduğunu, ailəsinin yeganə qazanc gətirən üzvü olduğunu və himayəsində azyaşlı övladlarının olduğunu nəzərə alaraq yüngülləşdirici hal tətbiq edilməsini xahiş edib.
Mərhumun həyat yoldaşı da məhkəməyə ərizə təqdim edərək tərəflər arasında barışıq əldə olunduğunu, övladların 18 yaşına qədər hər ay 300 manat ödəniş ediləcəyini bildirib və təqsirləndirilən şəxsə qarşı şikayətinin olmadığını qeyd edib.
Qeyd edək ki, Rəhim Musayev Sumqayıt Regional Telekommunikasiya İdarəsində fəhlə işləyib. (Adlar şərtidir)
Mənbə: Pravda.az
