Sumqayıtda bir qrup jurnalistlə görüş keçirilib. Sumqayıt24 bu haqda 22 iyul tarixində xəbər verir.
Tədbir Azərbaycan Yazıçılar Birliyinin (AYB) Sumqayıt bölməsi tərəfindən 22 İyul – Milli Mətbuat Günü münasibətilə Poeziya evində təşkil olunub.
Bölmənin sədri Gülnarə Cəmaləddin media nümayəndələrini təbrik edib, onlara yaradıcılıq uğurları arzulayıb.
İcra Hakimiyyətinin şöbə müdiri Fərman Kazımov mətbuatın keçdiyi şərəfli və keşməkeşli yoldan danışıb, bütün dövrlərdə qabaqcıl ideyaların carçısı olduğunu söyləyib. O, Vətən müharibəsində qazandığımız tarixi zəfərdə, Qarabağ həqiqətlərinin dünyaya çatdırılmasında mətbuatın misilsiz xidmətlərini qeyd edib.
Görüş iştirakçıları ölkə və region mətbuatının hazırkı problemlərindən danışıblar, fəaliyyətləri ilə bağlı təəssüratlarını bölüşüblər.
Sonda AYB Sumqayıt bölməsi ilə səmərəli əməkdaşlıq edən bir qrup jurnalistə fəxri fərmanlar və hədiyyələr verilib.
