Sumqayıt şəhərinin girişinə yaxın, "Meronun arxası" kimi tanınan yaşayış massivində vəziyyət artıq dözülməz həddə çatıb.
Məlumata görə, təxminən 700-dən çox fərdi yaşayış evinin yerləşdiyi, ümumi uzunluğu 1 kilometrə yaxın olan bu ərazidə insanlar illərdir ən vacib kommunal problemlərdən biri – kanalizasiya olmaması problemindən əziyyət çəkir.
Sakinlərin sözlərinə əsasən, son 8 il ərzində dəfələrlə kanalizasiya xəttinin çəkiləcəyi vəd edilsə də, bu vədlər kağız üzərində qalıb. Bu ilin mart ayından etibarən davam edən intensiv yağışlar isə problemi daha da kəskinləşdirib. Hazırda küçələr, həyətlər və ətraf ərazilər su altında qalıb, yaşayış massivi faktiki olaraq bataqlığa çevrilib.
Vəziyyəti ağırlaşdıran əsas səbəblərdən biri də ərazinin sonunda yerləşən "Coca Cola" və "Azərsun"un anbarı, həmçinin stəkan istehsalı sexinin tullantı və texniki sularını nasoslar vasitəsilə boş sahələrə axıtmasıdır. Kanalizasiya sisteminin olmaması səbəbindən həmin sular yağış suları ilə qarışaraq ərazidə böyük gölməçələr və bataqlıq sahələri yaradıb.
Vətəndaşlar aidiyyəti qurumlardan mövcud problemin həllini tələb edirlər.
Mənbə: Konkret.az
