Sumqayıtda ibadətgahın sökülməsi ilə bağlı iddialar yayılıb.
Söhbət Ceyranbatan yaşayış massivində yerləşən “Ceyhun xanım və Hacı Əhməd” məscidindən gedir. Sumqayit24.az-a müraciət edən vətəndaşlar bildirirlər ki, sözügedən məcsid balaca olsa da, buraya Saray, Masazır və H.Z.Tağıyev qəsəbələri, hətta Xırdalanda yaşayan vətəndaşlar gəlirlər. İbadətgah dolu olduğundan insanlar çöldə qalırlar.
Buna görə 5 il öncə məscidin genişləndilməsi işlərinə başlanılıb. Məqsəd həmin insanların rahatlığını təmin etmək, yayın istisindən, qışın soyuğundan, yağış və qarından qorumaq, ibadətgaha yerləşməyənlərə şərait yaratmaq olub.
Lakin bir neçə gün öncə tikinti işləri qəfildən dayandırlıb və ərazidə söküntü işlərinə başlanılıb. Bu isə vətəndaşlarda narazılıq hissi yaradıb.
Sumqayit24.az məsələyə aydınlıq gətirmək üçün Dini Qurumlarla İş Üzrə Dövlət Komitəsinə sorğu ünvanlayıb. Sorğuya cavab olaraq bildirilib ki, məscidin sökülməsi ilə bağlı məlumatlar həqiqəti əks etdirmir:
“Dövlət Komitəsinə daxil olan məlumata görə, söküntü işləri məscidin qarşısındakı qeyri-qanuni inşa edilən yarımçıq tikilidə aparılıb.
Belə ki, vaxtikən həmin ünvanda aparılan tikinti işləri Azərbaycan Respublikasının Şəhərsalma və Tikinti Məcəlləsinə uyğun həyata keçirilməyib, aidiyyəti qurumlardan müvafiq razılıqlar və rəylər alınmayıb”.
Şikayətçilər isə bildirirlər ki, tikinti işləri vaxtikən Sumqayıt Şəhər İcra Hakimiyyətinin icazəsi və razılığı əsasında aparılıb. Redaksiyamız tərəfindən bu iddianın həqiqətə uyğun olub-olmamasını aydınlaşdırmaq üçün Sumqayıt ŞİH-yə sorğu ünvanlanıb.
