Sumqayıt xəstəxanasında körpənin ölmə səbəbi açıqlanıb. Sumqayıt24 bu haqda 25 iyul tarixində BakuTV-yə istinadən xəbər verir.
Hadisə iyulun 21-də baş verib. Elsevər Quliyev bildirib ki, Siyəzən rayonunda doğulan övladının ağciyərində problem olduğundan Sumqayıt şəhər 1 saylı doğum evinə göndərilib. Körpə burada olarkən , o həkimlə mütəmadi əlaqə saxlayıb.
Həkim əvvəl hər şeyin qaydasında olduğunu, bir həftə sonra isə əksini deyib.
"Xəstəxanaya çatanda gördüm ki, həkim yoxdur. Zəngimə də cavab vermədi. Daha sonra növbəsi olmadığı üçün gələ bilməyəcəyini dedi. Uşaq ölənə qədər xəstəxanaya gəlib çıxmadı", - deyə E. Quliyev söyləyib.
Sumqayıt Tibb Mərkəzindən məsələ ilə bağlı açıqlama verilib. Bildirilib ki, körpə Sumqayıt Perinatal Mərkəzinə yenidoğulmuşun tənəffüs çatışmazlığı diaqnozu ilə köçürülüb. Anamnezə görə ana hamiləliyi dövründə ağır qrip keçirib və terapevt onu müalicə edib:
"Körpədə tənəffüs çatışmazlığı olduğundan tənəffüs aparatına qoşulub, müayinə edilib və protokola uyğun müalicə aparılıb. Reanimasiya və intensiv terapiya tədbirlərinə baxmayaraq, uşaq tənəffüs və poliorqan çatışmazlığı səbəbindən həyatını itirib".
