Sumqayıt şəhəri, 10-cu mikrorayon ərazisində yenidən kanalizasiya xətti adı ilə qazıntı işləri aparılır.
Sumqayit24.az-a müraciət edən vətəndaşlar bildiriblər ki, bundan əvvəl də həmin ərazinin sağ və sol hissələri qazılıb, yollar dağıdılıb, lakin işlər başa çatdıqdan sonra asfalt örtüyü bərpa edilməmişdi. Nəticədə həm piyadalar, həm də sürücülər uzun müddətdir narahatlıq və təhlükə ilə üz-üzə qalıblar.
İndi isə əvvəlki qazıntıların tam ortasında yenidən torpaq qazılır. İnsanlarda sual yaranır: əvvəllər görülən işlər nə idi və niyə bu qədər qısa müddətdən sonra eyni ərazi yenidən qazılır?
Məsələ ilə bağlı Sumqayit24.az-a açıqlama verən İri Şəhərlərin Birləşmiş Su Təchizatı Xidmətindən bildirilib ki, Abşeron yarımadasının su təchizatı, kanalizasiya və yağış suları sistemlərinin "Master Planı"na əsasən Sumqayıt şəhərinin və ətraf qəsəbələrin su təchizatı və kanalizasiya sistemlərinin yenidən qurulması layihəsinə uyğun olaraq 595 kilometr uzunluğunda magistral və paylayıcı su xətlərinin, 460 kilometr uzunluğunda kanalizasiya kollektor və xətlərinin inşası nəzərdə tutulub:
"Sumqayıt şəhəri, Corat və Novxanı qəsəbələri, həmçinin bağ massivləri və istirahət mərkəzlərindən Xəzər dənizinə axıdılan tullantı suların qarşısını almaq məqsədilə 15,2 kilometr uzunluğunda Novxanı-Sumqayıt kanalizasiya kollektoru inşa edilib, dənizə birbaşa çıxışı olan kanalizasiya xətləri bu kollektora birləşdirilib, 2 ədəd kanalizasiya nasos stansiyası tikilib. Ekoloji mühitin yaxşılaşdırılması məqsədilə icra olunan bu layihə sutkada 40 min kubmetr tullantı suyunun Sumqayıt tullantı sutəmizləyici qurğusuna ötürülməsini təmin edib.
Sumqayıt şəhərində kanalizasiya və yağış sularının idarə olunması məqsədilə Azərbaycan Dövlət Su Ehtiyatları Agentliyinin tabeliyindəki Tikilməkdə Olan Obyektlərin Müdiriyyəti tərəfindən yenidənqurma işlərinə başlanılıb. İlkin olaraq, "Acı dərə" kanalının trası boyu kanalizasiya və yağış suları sisteminin yenidən qurulması həyata keçirilir.
Həmçinin "Yaşıldərə" yaşayış massivi və 76-cı məhəllə ərazisində formalaşan tullantı sularının idarə olunması istiqamətində şəhərin bir çox küçələrində kanalizasiya kollektor və xətləri inşa edilir. Mövcud xətlər yenilənir. Layihəyə uyğun olaraq tikinti-quruculuq işlərinin icrası başa çatdırıldıqdan sonra asfalt örtüyü bərpa ediləcək".
