Sumqayıtda 17-ci mikrorayonda yaranan vəziyyət sakinləri təşvişə salıb.
Sumqayit24.az-a daxil olan məlumata görə, 7 və 8 saylı binaların arxa hissəsində yerləşən torpaq sahəsində yağıntılardan sonra yabanı otlar həddindən artıq böyüyərək ərazini sıx və keçilməz vəziyyətə salıb.
Vətəndaşların sözlərinə əsasən, otların çoxalması nəticəsində ərazidə müxtəlif sürünənlər, xüsusilə ilanlar görünməyə başlayıb.
"Son vaxtlar ilanların sayı artıb və hətta bəzi hallarda yaşayış binalarının birinci mərtəbəsində yerləşən mənzillərə daxil olduqları da müşahidə olunub", - deyə sakinlər narahatlıqlarını ifadə ediblər.
Bildirilib ki, həmin sahə əvvəlki illərdə təmizlənsə də, bu il indiyədək heç bir təmizlik işi aparılmayıb. Sakinlər məsələ ilə bağlı aidiyyəti qurumlara müraciət etdiklərini, lakin indiyədək problemin həlli istiqamətində tədbir görülmədiyini qeyd ediblər.
Bundan başqa, vətəndaşlar yay mövsümünün başlaması ilə əlaqədar yanğın təhlükəsindən də narahat olduqlarını bildirirlər. Onların fikrincə, ərazidəki otların quruması yanğın riskini daha da artırır.
"Yay fəslinin gəldiyini nəzərə alsaq, otların quruması qaçılmazdır. Ərazidə yığılıb qalan quru otlar yanğın təhlükəsini əhəmiyyətli dərəcədə artırır.
Xüsusilə isti və küləkli havalarda baş verə biləcək yanğınlar həm yaşayış binaları, həm də sakinlərin həyatı və əmlakı üçün ciddi risk yarada bilər", - deyə sakinlər bildiriblər.
Şikayətçilər aidiyyəti qurumlardan mövcud problemlərin aradan qaldırılmasını tələb edirlər.
